| ENG | GEO |
 |
ქარავანი ლიტერატურული არტ-კაფე მისამართი: თბილისი, ფურცელაძის ქ. 10 ტელეფონი: +995 32 99 66 91 ვებ-გვერდი: http://caravan.info-tbilisi.com/ |
კაფეს შესახებ
მაშრიყიდან მაღრიბამდე...
- სპეციალურად გადავდებ ხოლმე ყველა საქმეს კვირა დღეს და ლიტარატურულ საღამოებს ვესწრები.
- გონების უეცარი დაბინდვა დამემართა იქ შესულს.
- რაფინირებულია. დიდი ხანია სახლში ასეთი კარგი ემოციით არ დავბრუნებულვარ.
- იჯექი შენთვის, "წრუპე" ყავა, იკითხე საუცხოო წიგნები ხელოვნებაზე, გაეცანი მსოფლიო ისტორიის ენციკლოპედიას, დატკბი ჰიმენესის ლექსებით. მეტი რა გინდა?
- როგორ, შენ ჯერ არ ყოფილხარ? ჰმ...
აი, ასეთი და ბევრი ამდაგვარი რამ მოვისმინე ზემოთხსენებულ რესტორანზე. ეიუფ, ვიფიქრე ჩემი აუხდენელი ოცნება გახდა მეთქი და სასწრაფო ზომები მივიღე. ჰოდა, ერთ მშვენიერ საღამოს მე და ჩემი მეგობარი "ქარავანში" აღმოვჩნდით. სანამ შევიდოდი ნახევარი საათი გარეთ ვიდექი და ვუყურებდი ძველის-ძველ საბჭოურ მანქანას ЗИМ-ს და "ფორდის" ფირმის სატვირთოს (უდაბნოდან ახალ დაბრუნებულს ჰგავს), რომელზეც დიდი ასოებით აწერია "ბაგრატიონი და ენისელი. 1888". მეგობარმა ხელკავი გამომდო და შემიყვანა, თორემ გარეთ დავრჩებოდი დილამდე ოცნებებში წასული.
ჰო, გონების უეცარი დაბინდვა არ მომსვლია, მაგრამ არც დამკლებია.
ინტერიერი - აღმოსავლეთისა და დასავლეთის საინტერესო სინთეზი.
კედლები წითელი აგურისაა, რომელსაც ავსებს ნაქსოვი ხალიჩები, შუშის განათებული ნიშები, რომლებშიც ცნობილი მწერლებისა და პოეტების პორტრეტებია მოთავსებული და თაროები, სადაც მოთავსებულია თანამედროვე ქართული და უცხოური გამომცემლობების წიგნები. დაბალი შუშის მაგიდები და რბილი სავარძლები, რომლებზეც უამრავი ბალიშებია მიყრილი, კომფორტულია. იჯექი საათობით, ისაუბრე ლიტერატურაზე, დატკბი ცოცხალი მუსიკით, დაესწარი ლეტერატურულ საღამოებს ყოველ კვირა დღეს (14:00), დააგემოვნე უგემრიელესი აღმოსავლურ-დასავლური სამზარეულო, გასინჯე გამოჩენილი ადამინებისა და ცნობილი მწერლების საყვარელი კერძები (მაგ; დიუმას სალათი, ჰემინგუეის "სევიჩი"), მოწიე ჩილიმი და ღმერთო ჩემო, მართლაც გეგონება, რომ ყველანაირი ოცნება აგიხდება ამ საღამოს.
ძირითადი დარბაზიდან გადიხარ ბარის დარბაზში. ბარის დარბაზიდან მოჩანს თეთრი ფარდები, გადაწევ და აღმოჩნდები პატარა, მყუდრო ოთახში. განმარტოებისთვის იდეალურია. ასეთი ოთახი "ქარავანში" ორია.
"ქარვანს" აქვს საკუთარი ბიბლიოთეკაც და ისეთი წიგნები, რომელიც თბილისში ერთადერთია.
ერთი სიტყვით "ქარავნი" გთავაზობს, ლიტერატურულ საღამოებს, შეხვედრებს ხელოვნების სხვადასხვა სფეროს წარმომადგენლებთან, იდეალურ გარემოს გამოფენებისა და პრეზენტაციებისთვის.
რეზიუმე: მე აქ აუცილებლად დავბურნდები.