| ENG | GEO |
 |
იმერეთი ქართული რესტორანი ეზოთი მისამართი: თბილისი, მტკვრის მარცხენა სანაპირო ტელეფონი: +995 32 35 16 25; +995 32 35 56 33 ვებ-გვერდი: http://imereti.info-tbilisi.com/ |
რესტორნის შესახებ
"იმერეთი" ერთ-ერთი ყველაზე პრესტიჟული რესტორანია თბილისში. მისი პრეზენტაცია 1998 წლის 2 აპრილს გაიმართა და უკვე მეორე დღეს, რესტორანი მომსვლელებს ვერ აუდიოდა. აქ დღესაც ხალხმრავლობაა. "იმერეთი" არაერთი ჯილდოს მფლობელია. 2003 წელს გამართულ თბილისის რესტორნების კონკურსში კი ხუთიდან ოთხ ნომინაციაში აიღო ოქროს მედალი. რესტორანმა გაიმარჯვა ნომინაციებში: საუკეთესო ინტერიერი, საუკეთესო მომსახურება, საუკეთესო მზარეული და საუკეთესო მუსიკა.
ინტერიერი კლასიკურ სტილშია გადაწყვეტილი. მიუხედავ საკმაოდ დიდი დარბაზისა (იგი 150-300 კაცზეა გათვლილი და ხალხითაა სავსე), რესტორანში მყუდრო გარემოა. მომსვლელები აქ მეტად შინაურულად გრძნობენ თავს. ამიტომაა, რომ "იმერეთში" ოჯახებით დადიან, შეიძლება ითქვას, ხშირად, აქ ერთგვარი "ოჯახური საღამოები" იმართება.
მომსახურება მართლაც უმაღლესი დონისაა. მაღალკვალიფიციური მომსახურე პერსონალი ნამდვილი იმერული სტუმართმოყვარეობით უმასპინძლდება მომსვლელებს. იმერელი მზარეულები კი თვით ყველაზე დიდ გურმანსაც არ ტოვებენ უკმაყოფილოს.
სამზარეულო მხოლოდ ქართულია. "იმერეთში" თქვენ უგემრიელესი, იმერულად შეკმაზული, ქართული კერძებით გაგიმასპინძლდებიან. თანაც, ყველა პროდუქტი (გარდა თევზეულისა) იმერეთიდან ჩამოაქვთ, ყოველთვის ახალთახალი.
მუსიკა ასევე უმაღლესი, მხოლოდ ცოცხალი შესრულებით, "იმერეთს" თავისი, 12 კაციანი მომღერალთა ანსამბლი ჰყავს. ძირითადი დარბაზის ერთ მხარეს უზარმაზარი სცენაა, სადაც ყოველ საღამოს, სპეციალურად თქვენთვის, შოუს მართავს რესტორანთან არსებული ქართული ხალხური ცეკვების ანსამბლი, მომღერალთა ანსამბლთან ერთად. რაც ყველაზე მთავარია, მხოლოდ რესტორან "იმერეთში", ყოველ საღამოს, მხოლოდ თქვენთვის უკრავს ქსოვრელების შეუდარებელი და განუმეორებელი ანსამბლი "სიონარი".
რესტორნის მშვენება მისი ეზოა. თვალის ერთი შევლებითაც კი ნათელი ხდება, რატომ ჰქვია რესტორანს "იმერეთი". ესაა ტიპიური იმერული ეზო, იმერული ოდა-სახლებით. ზაფხულში აქ ჯდომას არაფერი სჯობს, ნაძვებისა და ორი ხელოვნური ჩანჩქერის წყალობით, ყოველთვის სასიამოვნო სიგრილეა. ეზოს ერთ მხარეს, ხელოვნური ჩანჩქერი პატარა ღელეს ქმნის. ღელეზე პატარა ხიდია, ზუსტად ისეთი, როგორიც იმერეთის სოფლებში; ამ ციცქნა ხიდით ვერანდაზე გადადიხართ. ვერანდის გვერდით ორი კუპეა, 12- და 30- კაციანი. ზემოთ კიდევ ერტი ვერანდაა. ეზოში ერთი დიდი და სამი პატარა ოდაა, ასევე 80- და 200-კაციანი დარბაზები. ერთ მხარეს ციცქნა იმერული ურემი დგას. იქვე კი დიდი სცენა და საცეკვაო მოედანია. ეზოში ულამაზესი შველიც ჰყავთ (რომელიც ჯერ კიდევ პატარა მოუყვანიათ აქ). სიღრმეში კიდევ რამნედიმე კუპე და ულამაზესი შადრევანია. სულ რესტორანში 14 კუპეა.
"იმერეთში" ყველაფერია იმისათვის, რომ თქვენ იმერეთის ხიბლი სრულად შეიგრძნოთ. მობრძანდით და ისიამოვნეთ!