ფერი ტინტორეტოდან კანალეტომდე

ფერი ტინტორეტოდან კანალეტომდე

„ფერი ტინტორეტოდან კანალეტომდე“
იტალიური მხატვრობის სამი საუკუნე ეროვნულ გალერეაში

27 სექტემბრიდან, საქართველოს ეროვნული მუზეუმი და იტალიის საელჩო საქართველოში წარმოგიდგენთ ტრიესტის ანტიკური ხელოვნების ეროვნულ გალერეაში დაცული ნამუშევრების გამოფენას „ფერი ტინტორეტოდან კანალეტომდე". დიმიტრი შევარდნაძის სახელობის ეროვნულ გალერეაში დამთვალიერებელი იხილავს იტალიური მხატვრობის სამ საუკუნეს – გვიანი რენესანსიდან როკოკომდე.

ეროვნულ გალერეაში წარმოდგენილია ტინტორეტოს, გუერჩინოს, ბერნარდო სტროცის, ანტონიო კანალეტოს, ჯოვანი ლორენცო ბერნინისა და სხვა ფერმწერების 55 ნამუშევარი.დამთვალიერებელი გაეცნობა XVI-XVIII საუკუნეების ჩრდილოეთ იტალიაში არსებული ფერწერის ძირითად სკოლებს – ბოლონიიდან (ჯუზეპე მარია კრესპი) გენუამდე (ჯოვანი ბატისტა პაჯი, ჯოაკინო ასერეტო, ჯოვანი ფრანჩესკო კასტილიონე) და ლომბარდიიდან (პიერ ფრანჩესკომაცუკელი და პიერ ფრანჩესკო ჩიტადინი) ვენეტომდე (ბონიფაჩო დე`პიტატი, კარლო კალიარი,
ფრანჩესკო მაფეი, ნიკოლა გრასი).

ექსპოზიცია დამთვალიერებელს სთავაზობს იმდროინდელი მხატვრობის ძირითადი მიმდინარეობებისა და ჟანრების – პორტრეტის, პეიზაჟისა და ნატურმორტის – ვრცელ პანორამას.ისტორიული, ალეგორიულ-რელიგიური და მითოლოგიური თემატიკის ფერწერის გარდა, აქ წარმოდგენილია ყოფის ამსახველი სცენები და ასევე, ანტონიო კანალეტოს ვენეციის ხედების ესკიზები.

გამოფენა „ფერი ტინტორეტოდან კანალეტომდე" პროგრამა "Vivere ALL’italiana"-ს ნაწილს შეადგენს, რომლის ფარგლებშიც ჩატარებული გამოფენები საქართველოში 150.000-ზე მეტმა დამთვალიერებელმა უკვე იხილა. იტალიური ხელოვნების გამოფენების ციკლი საქართველოში ორი ქვეყნის ინსტიტუციებს შორის მჭიდრო თანამშრომლობის შედეგია. იტალიური მხრიდან ეს ინსტიტუციებია: საგარეო საქმეთა და საერთაშორისო თანამშრომლობის სამინისტრო და იტალიის საელჩო თბილისში, ქართული მხრიდან კი განათლების, მეცნიერების, კულტურისა და სპორტის სამინისტრო და საქართველოს ეროვნული მუზეუმი. გამოფენა მომზადდა იტალიურ კომპანია Glocal Project Consulting-თან ერთად.

გამოფენის ხანგრძლივობა: 27 სექტემბერი - 20 ნოემბერი, 2019
მისამართი: დიმიტრი შევარდნაძის სახელობის ეროვნული გალერეა, შ. რუსთაველის გამზ. 11